قصة الخليقة باللهجة الجنوبية 16

Tuco Al Sandeigo

April 6 at 1:04am · 

1️⃣6️⃣
‫#‏قصة_الخليقة‬ ‫#‏العهد_القديم‬ باللهجة الجنوبية
يوسف ، ‫#‏يوزرسيف‬
بعد أن بارك ابراهيم اسحاق ولده من سارة وطرد اسماعين ولده من هاجر المصرية، استقرت الامور لاسحاق وفعل ما فعل اباه ابراهيم حيث بارك ولده يعقوب دون ولده عيسو
وهاي المباركات الموش على مالت ألله كلهن بسبب السعالو سويره أمْريت ابراهيم و راحيل أمْريت يعگوب، يقرن براسهم ليل ونهار.
ما علينا، بعد مباركة اسحاق ليعقوب و وراثته قطعان الماشية تزوج يعقوب بنات خاله، و هذن تگول عدهن مسابقة، وحده منهن ژابت درزن إله اثنين!! بطن لو معمل!! راؤبين وشمعون ولاوي وجاد و بعد ما تذكر اسماءهم، اذا هو يعگوب ابوهم يتيه بأسماءهم، تريدون اني اتذكهم!!

الثانية اختها ژابت يوسف وبنيامين،
هذولاك معكمشين اتعكمش، ويوسف وبنيامين طلعوا على سارة حمران وشعرهم يلصف من الشگار وبيهم ترافة ژدتهم سارة.

عويل يعگوب هواي، لوحدهم سلف بكبره، نسوان وچناين عشرة وفروخ، شيشبعهم!؟
الاولاد ترعى بالصخول والغنم والزلمة يعگوب يبقى يم الحرِيم والفروخ يحمي المنطر والنسوان يلگطن ويطحنن ويعژنن ويخبزن ويحلبن ويرضعن الفروخ وبالليل هم وراهن ‫#‏أُشتباكات‬ وي هذول الرعيان(‫#‏عيشتيش‬).

يوم من الأيام العويل كله ملتم علغده يتغدولهم خبيزه و حْليبه و يوسف نبص:
أگلكم أگـكلم، تدرون شتحلمت؟
شمعون: ولك انت أبو أيد البايدة، خل نتزقنب، وكت احلام؟ الدنيا الظهر.
نهره يعگوب: شمعون شبيك وي الفرخ!؟ بيش اطلبه؟ حاط گورك و گوره!؟ سولف بووية يوسف، سولف حلمك.
يوسف: چن بعالم الطيف، كلنا رايحين نحطب حطيبات، وكل واحد من عدنا حطبله كاره، عليش ما كارتي الحطبتها وكفت وكفه، وأژت ولفت كاراتكم كلكم.
ها ها ها ها ها، ضحك الجميع وقهقه راؤبين عاليا وقال:
خايب دَ گـم، أبو كاره، ها ها ها أبو أيد البايده، الباهت، يحطب كاره!؟ بيك خير بس شيل ايدك ليفوگ من چتفك!! مخلصها سايق مخده انت.
فنهره يعگوب: ولــكم انت شبيكم وي الفرخ!؟ موش أخوكم؟ بيش اطلبونه؟ ناصبين عليه كلكم!؟
لاوي: بووية، أحنه علموده، نريده يصير ولد أشچ يگضي العتبه، شوفت عينك أحنه واحدنا يعارك بروحه من الوكاحه وما مدبرينها، وهو مايع من حلاته! خاف يكظونه الكنعانيين ويسردونه سرد ونشتهر!!؟
يعگوب: د أنچب أنچب، عود هو يعرف يحچي أبو الچعچ المجرجف.
وكان طعامهم زقوم بسبب المشاحنات التي لا تنقطع.

ذهب الابناء الى المرعى وبقي يوسف بقرب ابيه كعادته وهو بعمر الصبا.
وفي صباح يوم قائظ جلس يعگوب ينتظر ابناءه قلقاً عليهم لتأخرهم واذا بيوسف يأتيه مسرعاً:
بووية بوووية.
يعگوب: ها بعد أبوك
يوسف: بووية تدري شتحلمت؟
يعگوب: اهووو شمالك بعد ابوك!؟ انت ما تژوز من هاي احلامك؟ صدگ چذب!؟ ‫#‏لاتچل_ولاتمل‬!؟ النوم الهواي موزين عليك بعد ابووك، أتصير مضحكة.
يوسف: فشلتني بووية!؟
يعگوب: لا لا تزعل بعد ابوك وچلاويه، سولف سولف.
يوسف: بووية تحلمت اهدعش كوكب والشمس والگمر يسجدون لي.
يعگوب: أممممم، بووية لا تسولف حلمك لخوتك، بسك بسك، انت بعد چم تژيني متحلم انت الله!!
تروح غسل وشّك أول مرة، وتريگ و روح الحگلي اخوتك شوفهم ويين صار بيهم الدهر، تعطلو هواي.
ها و دير بالك اتسولف حلمك هذا ابو الشمس والگمر.
......
يتبع

Tuco Al Sandeigo

April 6 at 4:40am · 

ماكو وكت، بعد ورانا شغل هواي، خل نخبزهم خبز.
1️⃣7️⃣
‫#‏قصة_الخليقة‬ باللهجة الجنوبية
يوسف٢
+١٨ و نص ربع
بعد ان ساور القلق يعقوب على ابناء الرعاة، ارسل خلفهم ولده الاثير يوسف ليتقصى خبرهم.
أبصر الرعاة ابناء يعقوب أخاهم يوسف قادماً يجر خطاه متثاقلاً
صاح لاوي:
أسسسسستلموا شوفو ياهو أجاكم؟
طبت الچطله، أجاكم الچادود.
ضحك الرعاة.
ها يوسف مدلل ابوك، شجابك؟ منك من الشيطان تشرفنا بالمرعى؟
يوسف: ابووي وداني وراكم، ظل باله عليكم، تأخرتو.
لاوي: عدنا چم صخلة ژابت ونريد نكمل ونرجع.
ومازحوه، وكان مادة تندرهم، حتى حان موعد تناولهم طعامهم.
افترشوا الارض واخرجو خبزهم ون
ما أن مدو ايديهم لتناوله حتى قال جاد هازئاً:
شعجب يوسف اليوم مامتحلم؟
سكت يوسف متذكراً وصية يعقوب ثم لم يطق صبرا:
تحلمت تحلمت، اهدعش كوكب والشمس والگمر بسجدولي.
ضحك الجميع ضحك هستيري إلا شمعون فكان نزقاً سريع الغضب
نهض و اسرع باتجاه يوسف و رفعه و ركض به باتجاه البئر ورماه فيه وعاد ليتناول طعامه.
راؤبين: هاي شسويت!؟ انت صدگ اريعن؟
روح جيبه.
شمعون: خل يولي، خل ناكلنا لگمة.
لاوي: لك بابا روح جيبه، لايصير بيه شي.
شمعون: افتهمنا افتهمنا، بس خل ناكل لكمه براحة و من نخلص شغلنا اطلعه وناخذه ونرجع لأهلنا،
سللني، موتني، احنه رب ربنا مستلگ من الحر والحرمس والشمس وهو يجيني الباهت المتختخ سجدتله الشمس!!؟
راؤبين: خوش خوش، بس مو تنساه.
وعادو لطعامهم واعمالهم وعندما حان وقت العودة تذكروا يوسف!!
عادو مسرعين للبئر فلم يجدوه*
فأُسقط في ايديهم، ماذا يفعلو!؟ ما يقولو لأبيهم!؟
أكله الذئب
وكان ماكان
أما يوسف فقد أخذته قافلة تجار الرقيق الى مصر، وباعوه لقوطي فار أحد مخصيي الفرعون، الذي اعجبه جماله و رقته.
زليخة زليخة، ژبتلچ غُلام عبراني يشگ شگ، ترف ترافه أخت الچذب.
زليخة: شسوي بالغُلام؟ اني اريد خادم كون حبشي آبنوسي يلصف، عربيد مو بشر، ياله افوخ من التعب.
قوطي فار: شيفوخچ انت؟ اذا حتى أمينة فاخت وانت ما تفوخين؟ نگلت عليچ الحبشة كلها وما فختي، فلوسي كلهن صفن عد تجار الرقيق بس مو وراچ.
زليخة: د اسكت اسكت، الخصي، لا تصچم.
وحين دخل يوسف والقى التحية على مولاته زليخة، ‫#‏داخت_بالمعاملة‬ اعجبت به و انصطرت صطر، كما داخ وانصطر فرعون بمعاملة سارة زوجة ابراهيم.
ما هي إلا أيام وأصبح قوطي فار و ما يملك طوع أمر يوسف.
وكان جماله و رقته جواز سفره ومفتاح النعمة التي انعمها الرب عليه( نعمتيش! ترافة وي المصريين الاوائل، اذا هي نعيمة الصغير ادّْور حلوين).
ولهت زليخة بيوسف واصبحت لا تطيق فراق الفتى، حتى راودها الشيطان( الشيطان‫#‏يحلف_ويتكفر‬ يگول مو اني، ولا موسوس لها)،
زليخة: يا يوسف
يوسف: نعم يامولاتي
زليخة: هيت لك.
يوسف: صار مولاتي، ويين مخليتها؟
زليخة: شني ولك؟ هيت هيت لك.
يوسف: هي شنيه الـ هيت؟ گلادة، محبس، جونيه مال اطحين!؟
زليخة: ولك تعاااال نشتبك.
يوسف ما يعرف للشغلة
فاحتضنته والتهمته السعلوه
يوسف ارتخى وباد حيله و لا يدري ما يفعل.
حتى هم بها وما دبرها، فهرب
وخشت السعلوه من الفضيحة فصرخت
كظوه كظوه ولكم چهبني هذا الفويسد.
وانتشر خبر زليخة في كل المجتمع المخملي المصري
زُليخة كظوها هي وخادمها العبراني.
قوطي فار: ولچ اشسويتي!؟ خزيتينا وشهرتينا الله لايوفقچ، هلبت تچلين تملين!؟ اي رهازه، اي شباخه!؟
زليخة: هلو هلو بالشريف! شلونك انت، شحال لو ما خصي!؟ شگالولك منين جايبني!؟ چا انت مو تدري اني زوجة الاله امون؟
قوطي فار: ولج يا امون!؟ هيه مال امون؟ خلي السالفة مستورة.
زليخة: راح اشتكي عند الاله آمون.
قوطي فار: والمجتمع الفرعوني شسويله؟ وين انطي وجهي منه!؟
معليك معليك هسه تشوف المجتمع.
و أولمت وليمة ودعت كل نساء المجتمع المخملي الفرعوني،
حطت گبالهم فواكه وسچاچين وطببت يوسف عليهن وهنه كلهن ‫#‏داخن_بالمعاملة‬انصطرن، كصصن ايديهن
‫#‏شحلاته‬ ‫#‏والله_قطعة‬ ‫#‏خوش_قبچ‬...الخ هكذا اطلقن لمخيلتهن في الوصف.
ثم ادخلتهن واحدة واحدة على يوسف،
مختصر مفيد كـلــــهن سلچن على يوسف.
فخطبت زُليخة فيهن، منتقمة منهن:
يا گحاب يا فاسدات يا رهازات
وحدتچن راكضة وي خيل الريسز
ما ظل كاهن ما اشتبكتن وياه
بحجة زوجات الاله امون و شبعوا بيچن الكهنة ويين الأكرع وابو صماخ.
هسه صايرات شريفات براسي
فطأطأن روؤسهن من الخجل والتمسن العذر لزليخة و طلبن منها ان تعيرهن يوسف لكل واحدة ليلة.
فقالت زليخة: خايبات والله متوهمات! هذا ‫#‏مبيعرفش‬.
هكذا كان وألقي يوسف في السجن لأنه مبيعرفش.
...............
*تفسيرات هواي،

Tuco Al Sandeigo

April 6 at 4:41am · 

ماكو وكت، انريد نلحگ

1️⃣8️⃣
‫#‏قصة_الخليقة‬ باللهجة الجنوبية
يوسف٣

في السجن أُعجب الحراس وكل أسافل السجن، من ردهة ٥ حافيات المياه الى ق ١٣ وتسابق دهاقنة الاجرام لكسب وده لجعله ‫#‏سفرداش‬ لهم من الاخ رحمن الفدائي وحاتم حكومة مرور بحجة السفلة والساقطين سعدي الاسود وابراهيم هظيمة فضلاً عن جميع ‫#‏العنقرچية‬ وهذه بديهية من بديهيات فقه السجون، الحلو لابد من شقي يحميه ويصطفيه لنفسه.
حتى أعلن قائد السجن بيانه الحاسم:
السجن ومن فيه طوع أمر يوسف، واليحچي وياه أنعل والدي والديه،
يوسف ‫#‏يخصني‬.
فأصبح السجن طوع بنان يوسف، مفتاح ذلك الدائم جماله ورقته في مجتمع ذكوري يعاني من نقص حاد في الترافه والجمال،
مضت الايام في السجن ويوسف يزداد حظوة فيه، حيث ان امر السجن اعلن:
السجن وحراسه والمساجين كله بيد يوسف، واليحچي وي يوسف أنعل والدي والديه.
وهكذا كان يوسف محمي بسلطة آمر السجن، يقضي أغلب لياليه وايامه في جناحه. حتى أصبح هو المتحكم في السجن ومن فيه.

في صباح من صباحات السجن فتح باب السجن والقى فيه
ساقي الفرعون، وخبازه بعقوبةٍ من الفرعون.
الساقي حلم حلماً والساقي كذلك، وكانت فرصة يوسف للوصول الى فرعون.
الساقي: تحلمت ٣ عناكيد عنب من ٣ اشجار واعصرهن.
يوسف: انت تطلع بعد تلثتيام وترجع لشغلك.
الخباز: تحلمت شايل ٣ سلال خبز على راسي والطيور تاكل منهن.
يوسف: انت يعدمونك بعد تلثتيام.
فأستغل السجناء هذه الفرصة خاصة وان السجناء عموماً كثيرا ما يحلمون.
سجين١: اني تحلمت أمي جايتني مواجهة.
يوسف: اضغاث احلام
سجين٢: اني تحلمت متزحلك و واگع:
يوسف: اضغاث احلام.
وهكذا كان كل الحالمين من السجناء احلامهم اضغاث احلام حسب تفسير يوسف إلا ساقي وخباز الفرعون!! ( طبقية في تفسير الاحلام).
طبعاً السجناء لم يسكتوا على هذه الطبقية فسرت شائعات رددها سجين رقم١:
خايبين يا تفسير يا احلام!؟
احنه احلامنا تفسيرها اضغاث، وساقي وخباز الفرعون جابهن بالمظبوط تلثتيام!!؟
هذا ‫#‏بايگ_الاسئلة‬ من آمر السجن حبيب الأءلب. ( ارتكبو على يوسف).
وعادت الايام رتيبة في السجن حتى حلم الفرعون احلامه السنبلية والبقرية ولم يجد تفسيرا فتذكر الساقي يوسف.
فسر يوسف الحلم فاعجب ذلك الفرعون والذي اعجب ايضا بجمال يوسف ورقته فاصطفاه لنفسه وسلمه مفاتيح مصر.
وهكذا كان
يوسف العبراني يحكم مصر بسلاح الرقة والجمال.
وضع يوسف خطته و احتكر كل ما تنتجه ارض مصر من طعام و اشترى كل حبوب البلدان المجاورة لسبع سنوات.
ثم لسبع اخرى باع الحبوب للجياع من المصريين والشعوب المجاورة.
باع المصريون كل املاكهم لحساب فرعون و انعم عليهم بابقاءهم فلاحين على شبع بطنهم في املاكهم.
وفي سنة اخرى اشتراهم و ذرياتهم ليشبعو بطونهم الجائعة فأصبح كل شعب مصر عبيداً للفرعون بأشراف العبراني يوسف.
اصبح كل شيء وأي شيء ملك فرعون وبأدارة نبي الله يوسف! الارض والبشر والحيوان. لم ينج احد من المجاعة إلا ال يعگوب بنعمة من يوسف،
وهكذا اجتمع ويوسف واهله في مصر واقتطع لهم اراضي للرعي و بقي يحكم مصر وتزوج من ابنة الكاهن وعاشو عيشة سعيدة.
..........
هاي قصة الحلو يوزرسيف خلصت

قصة الخليقة 15 باللهجة الجنوبية

Tuco Al Sandeigo

April 5 at 1:03am · 

1️⃣5️⃣
‫#‏قصة_الخليقة‬ باللهجة الجنوبية
+١٨
بعد أن ارتحل لوط و رعاته الى سدوم، جلس ابراهيم وزوجته ساراي وجاريته المصرية هاجر التي وهبها له فرعون( بدل اندثار موجودات ثابتة مال سارة)* في مذبح الرب و قدمو قرباناً واشعلوا البخور وناجى ابراهيم ربه:
ربيي جل جلالك، ‫#‏چا‬ اني مو طلبت منك ترزقني أوليد أوحيد، فرد أوحيد ما طلبت منك هواي!
شوفت عينك، حلالي هواي، شي صخول، وشي غنم و شي هوش، ينرادلهن حزام زلم ياله يرعون بيهن، وآني طبيت بالعمرين و بعدين ألمن أخليهن؟ تقبل يورثني خادمي اليعازر الدمشقي!
؟ربه: ابراهيم، لتلح، انت هواي تلح، ساعة تريد يطمأن قلبك، ساعة تريد خلفه!؟ ماعندي شغل وعمل بس انت!؟
ابراهيم: استغفرك واتوب اليك، چا انت مو تعلم الجهر وما يخفى!؟ هلتشوفني بعازة الولد وهاي مريتي ساراي كبرت وفرعون الله لايوفقه استهلكها كلشش، اذبحلك ذبيحة خاف عيب متعشي!؟( أبو مصلحة).

ربه: ذبيحتيش!؟ انت مسوي عليه منِّيَه بالصخول التذبحهن!؟ حتى لحمهن معصي ، صخولك مچننات، شتوكلهن فول مثلن!؟
بس مع ذلك انت عزيز علي انت عبد آواب*، راح ارزقك بولد كثير واعطيك هاي الارض كلها( والله سپورتي و خوارده!؟ اشگد يوزع گيعان)، من الان ساراي تسميها سارة وسننعم عليك بعدها.
ونزل ابراهيم مغموما و حطله مخدة ونام چفي، فاقتربت سارة منه قائلة:
شبيك مكدر ونايم چفي؟
ابراهيم: ما شفتيه؟ مخلصها وياي اعطيك هذه الارض و راح اجعل ولدك أمة، وهلتشوفينه لا ولد ولا هم يحزنون، الحصلته منه بس غير اسمچ من ساراي لسارة؟ على اساس هو مدير احوال شخصية!.

سارة: أگلك ابراهيم، انت عليش ما تنام وي هاجر المصرية بلكت تخلف؟
ابراهيم: ها، خاف ما حبلها چا اني هم كبرت؟
سارة: چا انت اذا ماتحبل هاجر شلون تحبلني اني العژوز!؟
ابراهيم: اي صدگ، خل نجرب بهاجر.
وكان ما كان وولدت هاجر ولدا، فسماه اسماعيل واقام ذبيحة للرب.
في ليلة من الليالي المقمرة ابصر ادم ثلاثة قادمين باتجاه خيامه على ربوة الجبل:
هاااا هاااا يااااهم ذول؟
خطااار خطططار رد القادمين
اهلن وسهلن بيكم تفضلو تفضلو.
فجلس وضيوفه داخل الخيمة واذا بوجوههم تنير الخيمة نوراً وجمالاً
نحن رسل ربك لنخسف ارض سدوم لأن اهلها فسدوا فيها و مو بس نخسف الارض بل ننعل والدين والديهم هذول الساقطين.
ابراهيم: كلهم ولا تخلون واحد!؟
الملايچه: ولا نخلي نفاخ النار، ولا لواث!؟
ابراهيم: علييشش!؟
الملايچه؛ جيفوها، فساد، ‫#‏فرخچيه‬، ذكر يركب ذكر، انوب حتى المطايا ما خلصت منهم!؟
ابراهيم: اممم، وانا اكول لوط ليش راح لسدوم!!،
چا اتعشو عشاكم واطلب منكم طلب( ابو مصلحة)، هلبت تعفون ابن اخوي لوط من الخسف هو وعويله والحلال مالته.
الملايچه: يجرالك يجرالك، تدلل تدلل، انت عزيز وغالي والرب يحبك و اعطاك....
ابراهيم مقاطعاً: ادري ادري هاي ملليت منها سامعها ينطيني الارض ويخليني امة.
الملايچه: اصبر اصبر سارة راح اتژيب ولد.
سارة ضحكت فسمعو ضحكتها:
انت ماتستحين تسنطين؟
هاي سوالف مال ملطلطات مو مال زوجات انبياء آوابين، جوزي من سوالفج.
وهكذا كان
نزل الملايجه على بيت لوط، فـ ‫#‏باگ_هوا‬ منهم فقالوا له لا تخف لا تخف بختك بعمك ابراهيم وصانا عليك.
وهم في هذا الحال واذا بالضجة خارج دار لوط، جمع غفير!!
يا لووط يا لوووط
لوط: ها شكو؟ شكو
الجمع: ولك طلعلنا هذول الحلوين، لا ‫#‏الدنيا_نحرگها‬.
لوط: ولك قرومه #فرخچيه، هذول ملايچه الرب الصالحين.
الجمع: خوش عليك صالحين انت هم صالح، انت مبربع بيهم، جيب اثنين وخليلك واحد.
لوط: اتقوا الله ياقوم، هاكم بناتي اثنينهن، و روح هاران بعدهن صرمهر، بلادي، وحدتهن نيكل، اشبعو بيهن، العبو بيهن بس عوفو هذول خطاري.
الجمع: ‫#‏گول_عله‬ أبو درب، هيه مال بناتك؟ شگلولك علينا ندور بنات!؟ طلعهم طلعهم، لا نحرك البيت، كلشي محضرين، الخمر و الدفوف و ‫#‏الدنيا_مشتعله‬ لا تخرب السهرة.
الملايچه: هذول صدگ سرسرية!؟ شيريدون!؟
لوط: يريدون يتنااااااقشون وياكم و يسسستنننننجون شنو انتم؟
الملايچه: أشگد عيب!؟ بلله هم هذول قوم؟ أكو واحد ينـــــــاقش ملاك!؟ صدگ ممتربين، ادبسزيه، ‫#‏دلقليه‬!.
عوفهم عوفهم
رش الملايچه قليل من غبار فغشيت ابصار الجمع وخرجوا وخرج لوط واهله وخسفت ارض سدوم ولم تنج امراءة لوط لأن التفت ليوره!؟ ( البيها ما يخليها، تموت على الالتفات ليوره).
كل هذا حصل وابراهيم ينظر من اعلى الجبل، ويدعو لنجاة ابن اخيه ولم يرتاح حتى وصل لوط وبناته الى مغارة على جبل.

فلما دخل لوط وبناته الغار، اضطجع على جنبه وطلب الطعام ، فنادت الكبرى اختها الصغرى
اگلچ هسه أحنه شلون؟ نبقى بلا ولد؟
ابونا شايب ومخلصها وي الفروخ، شلون نحمي نفسنا؟
الصغرى: و شنسوي هذا أمر الرب.
الكبرى: تعاي خل نسكره و انام وياه و انوب انتي نامي وياه بلكت نخلف منه.
وهكذا كان فولدت الغبيرة ولداً اسمته موآب ابو الموآبين و وولدت الصغيرة عمون ابو بني عمون، و نبي الله لوط مغلسسس ‫#‏ولايمه‬، نامن بناته وياه وهو #ولايمه حبلن تسعتشر وهو #ولايمه خلفن بناته وهو #ولايمه!! هذا نبي مال بتاوويين؟ مال الصابونچيه!؟
أما ابراهيم فأنعم الرب عليه بحبل سارة بغلام اسماه اسحاق، وكان يوم فرح عظيم بعد ان بلغت سارة الشيخوخة واليأس.
وكان عمره اسماعيل ١٣ سنة حين ولد اسحاق. وعاشو ردحا من الزمن وهم في فرح حتى اتت سارة لابراهيم:
اليوم لو اني لو هاي هويجر مريتك المصرية أم الفول وابنها.
ابراهيم: شكو شكو
سارة: شني ابنها يغلط على ابني اسحاق ويگله ابن الحمره.
ابراهيم: يلله يلله شكو بيها هم اخوان، واثنينهم ولدي.
سارة: لاتگول ولدي، شني هاي المصرية الزرگه أم صوفه اتخاي راسها براسي!؟
وهكذا طرد ابراهيم زوجته هاجر وابنه اسماعين، ونزل ملاك الرب بانه سيجعل من اسماعين أمة كبيرة ( عفية رب بس يلزگ لبراهيم)!.
.................
ما يتبع، هيه مال يتبع؟
فروخ وفرخچية وزنا بالمحارم، و ‫#‏رب_لاحم‬ ماعنده شغل وعمل بس يوزع گيعان و يبرر لابراهيم.

قصة الخليقة باللهجة الجنوبية 13

Tuco Al Sandeigo

April 4 at 8:55am · 

1️⃣3️⃣
‫#‏قصة_الخليقة‬ باللهجة الجنوبية
ابراهيم
ولد لنوح بن شيت ثلاثة ابناء هم سام ويافث وحام الشاف مالات ابوه وابتلى على عمره.
خلونا من يافث وحام وخل نلتهي بـ سام هو السالفة كلها يمه.
سام خلف ابناء واحفاد لحد ما صار تارح .
تارح خلف ابراهيم وهاران وناحور.
هاران مات وعنده فرد أوليِد اسمه لوط يتيم.
ذاك اليوم گاعدين كلهم بالكوسر مال الخيمة يتسامرون وصاح تارح ابو ابراهيم:
برهم بووية.
ابراهيم: ها بووية!؟
تارح: برهووم شوف عينك احنا حلالنا كثر وهذول الكلدانيين وادم متعافيين و مريتك ساراي حلوة و أحميره وخاف يصير مايصير، عليش ما نشوف غير ديرة؟ ونخلي اخوك ناحور أهنا يحمي المنطر خاف أنرد ردود.
ابراهيم: بووية الشور شورك والراي رايك، بكيفك.
تارح: چا بووية، ولم غريضاتنا وحليّلنا و خل نمشي صوب الكنعانيين مو كلش يمهم أهبط منهم بحاران.
ابراهيم: ها يهيه بووية.
يومين تلاثة ولمو غراضهم ومشو صوب حاران، تارح وابراهيم ومرته ساراي و لوط اليتيم ابن هاران اخو ابراهيم.

وحين وصلوا حاران ونصبو الخيام أقامو مذبح للرب. مرت الايام والليالي وتناسلت الصخول والغنم والهوايش و اصبح ابراهيم مسؤولا عن العائلة بعد وفاة تارح.
فنزل ملاك الرب مبشرا ابراهيم بأن هذه الارض ستكون له ولنسله.
ابراهيم: سلملي على الرب، ‫#‏هلبت‬ يرزقني بخلفه؟ هاي ساراي ما تخلف؟
ما خليت عارفه ما رحتلها، ما خليت مقويات ما شربتها، ما تخلف عاجر و الحلال ينرادله چواديد واني بطرگ روحي ولوط؟

الملاك: خوش عود الله كريم، هلبت فرد يوم ويفتحها بوجهك، بس انت اذبح صخلة ام ٣ سنين وخروف ابو ٣ سنين وهايشة ام ٣ سنين لوش الله وتعالى.
ابراهيم: صار واني الممنون( هلبت يمل ويچل من الذبايح؟ رب لو سايق مال تريله).
مرت سنين ولم يحصل لساراي حمل حتى حدثت المجاعة والقحط، فأستأذن ابراهيم ربه في الهجرة الى مصر.
فأذن له وقال:
ابراهيم دير بالك من توصل لمصر تگول ساراي زوجتي؟
ابراهيم: چا شگول!؟ خالتي مثلاً!؟
ربه: لا ولك گلهم أختي، ترا بس تگلهم زوجتي ‫#‏يدچچونك‬ ويموتونك ويتزوجونها.
ابراهيم: هذا حچييش!؟ انت متأكد انت ربي؟ شلون تقبل زوجتي واكول اختي؟ هيه هاي سوالف مال رب!؟
ربه: ظل يطبك مرض فوگ مرض! فوگ ما ارتبلكياها، اني لخاطرك مسويها الشغلة، و روح تارح ابوك، غيرك لو يوذن ما اسمحله يسوي هاي الشغلة، گبل ألبسه دعوة مال زنا بالمحارم.
ابراهيم: خوش خوش.
.................
يتبع

Tuco Al Sandeigo

April 4 at 11:48am · 

1️⃣4️⃣
‫#‏قصة_الخليقة‬ باللهجة الجنوبية
ابراهيم ولوط
نزل ابراهيم وزوجته ساراي ارض مصر، ووصل خبرهما لفرعون مصر إذ قال حاجبه:
ايها العظيم نزل ارضنا اليوم عبراني يدعى ابراهيم و وياه ‫#‏گزازه‬ أخت الچذب.
ف وجم فرعون مصر: ولك شنو گزازه!؟
الحاحب: ‫#‏ژلده‬، ‫#‏نمرشه‬، ‫#‏عنگه‬
الفرعون: انت ماتجوز من سوالفك مال الحوشيه والرشاگه! ؟ شنييه!؟
الحاحب:وياه وصله وصله، گاعده على حيلها، مره مره، بت بيها ستين حظ.
الفرعون: الله يطيح حظك خو گولها من الأول وياه مره!؟
الحاحب: چا هيه كل مره مَره!؟ هسه تشوفها واذا ما ‫#‏دخت_بالمعاملة‬ اني معتب.
فذهب الفرعون من فوره يدفعه الفضول.
الفرعون: من انت ايها العبراني، ومن هذه المرأة التي معك، ما تريد؟
ابراهيم: انا ابراهيم بن تارح العبراني وهذه أختي ساراي، جئتكم لاجئاً لجوء انساني، كتلنه الژوع بأرض كنعان.
الفرعون: خوش خوش، منتاز منتاز ما دام هاي اختك، انطينياها و روح بأرضي العب لعب الخضيري بشط.
وهكذا كان، ساراي الحمره النشيطه و فرعون أبو فچوچ عنده ترك قوووي بمسائل الترافه والجمال.
الافندي ابراهيم يرعى بالصخول والفرعون يرعى وي ساراي والعلاقة طردية بين غنى ابراهيم وتمتع فرعون بساراي.
حتى اكتفى ابراهيم ولم يعد له القدرة على عد ما يمتلكه من صخول وهوش وغنم، فدخل على فرعون ليستأذنه بالخروج الى دياره فبادره فرعون:
أنت صدگ ما تستحي؟ ولك انت أُرني!؟
ابراهيم: شنو أرني؟
فرعون: يعني گرن؟ شلون تگول ساراي أختك وهي مرتك؟
ابراهيم: خفت منك تكتلني، و الذرورات تبيح المحذورات.
فرعون: خوش عليك ذرورات؟ يا ابو الذرورات؟ ترووح لم مالاتك و ولي من ارضي.
و عاد ابراهيم و زوجته ساراي وابن اخيه لوط الى ارض كنعان بما غنمه في ارض مصر وكان مالاً كثيراً.
ابراهيم: اكلچ سارة هذا الفرعون ابو فچوچ شمدريه انت زوجتي؟
ساراي: خايب درووح انت مصدگ هو ما يدري؟ چا هو غير فرعون وعنده استخبارات، هو يدري بس غلس خسران خسارة ويين شايف هيچ قطعة!؟ لحد ماشبع ومل گال انت زوجة ابراهيم.
ابراهيم: سدي الموضوع سديه لحد ما نوصل للمذبح ونذبح چم صخلة وخروف لربنا وهو يحل المشكلة
‫#‏مادام_أكو_ذبايح_أكو_حلول‬
وكان ما قال.

في ارض كنعان ضاقت الارض بقطعان ابراهيم و ابن اخيه لوط حتى اختلف رعاتهم، فنادى ابراهيم لوطا
ابراهيم: لوط بعد عمك، اني ربيتك وتعبت عليك، وخاف تصير بيناتنا خراب ومشاكل من ورا رعيانا، ‫#‏عليش‬ ما تاخذ حصتك وتمشي لارض سدوم، قريب مو بعيد والمرعى بيها زين؟
لوط: بكيفك عمي.
ابراهيم: بس بعد عمك جوز من هاي سوالفك، انت كبرت اتزوج وخلف لا تظل هيج.
لوط: عمي يا سوالف؟ ‫#‏شتقصد‬؟
ابراهيم: خل يولن ‫#‏خل_يولن‬ لاتبيعهن علي؟
لوط: علكيفك عمي علكيفك، هسه شحال لو ما انت سلمت ساراي بيدك لفرعون، علگولتهم‫#‏خيه_انت_أخنسي_واني_أخنس‬.
ابراهيم: مو صوچك
.....
يتبع

قصة الخليقة 11

Tuco Al Sandeigo

April 3 at 1:13pm · 

1️⃣1️⃣
‫#‏قصة_الخليقة‬ باللهجة الجنوبية
من ادم الى نوح.
بعدما قابيل المجرم( الفلاح*) قتل اخوه هابيل( الراعي)، وطرده خارج ارض ابيه ادم.
ژله قابيل لغير گاع، أخذ مرته وياه وأبنه حنوك( ابو حنچ) وبنى مدينة وسماها على اسم ابنه وحنوك خلف 
عيراد، عيراد خلف محويائيل
محويائيل خلف متوشائيل
متوشائيل خلف لامك
لامك أخذ أثنين نسوان وحده اسمها عادة و وحدة اسمها صلة،
عادت ژابت يابال وهذا يابال هو والد كل ضارب خيام وراعي مواشي.
وژابت بويال وهذا ولد كل ‫#‏طبلچي‬ وعازف مزمار وبزاخ.

والمرة الثانية صلة ژابت ولد اسمه توبال قايين وهو والد ضارب كل الة نحاس( بوقچي مدري حداد مدري صفار)، و ژابت بنية اسمها نعمة.
ادم هم عرف مرته وخلف منها ولد اسمه شيت تعويض عن هابيل.
ما طول عليكم السالفة وادوخ.
شيت هو جد نوحابن لامك،
مالي خلگ اعددهم مثل التوارة، متوشالح و مدري ياهو حتى اسماءهم الله گالبها!!
هواي وكل واحد عايش مدري چم سنة.
انوب دوخني؟ ‫#‏دخت_بالمعاملة‬!؟
هو اللي كتب التوارة چان بسجل النفوس!؟ شو يعرفهم كلهم ويعرف نسوانهم
وانوب ناس يغلس عليها لايگول شخلفت شجابت!؟
‫#‏قصتيش‬ هاي
يتبع لابو حتى لامك ابن متوشالح ابن اخنوخ ابن يارد ابن مهائييل ابن قينان ابن انوش ابن شيت ابن ادم
..................................
*التوراة كاتبها راعي او ابن رعاة
طلع الفلاح مجرم

Tuco Al Sandeigo

April 3 at 10:30pm · 

1️⃣2️⃣
‫#‏قصة_الخليقة‬ باللهجة الجنوبية
نوح

عندما بلغ ادم سن المائة والثلاثين ولد له شيت وعاش بعد ذلك ثمانمائة سنة فكانت ايام ادم ٩٣٠سنة! سنة تنطح سنة.
وولد لشيت اولاد وأحفاد حتى كان لامك*ابو نوح ثم ولد لامك نوحا.
وبارك الرب نوحا فولد لنوح ثلاثة ابناء( اشكثر يخلفون).
سام ويافث وحام.
وكان رجل صالح يزرع الارض ويحيها ‫#‏بلاكت‬ في زمن نوح كثرت البشرية، صارو هوااي كلششش!
اذا واحدهم يعيش تسعمية سنة وبس يخلف!! الگاع ماشالتهم، الزرع ماكفاهم وفوگ كل هذا الضيم اكو قوم اسمهم الجبابرة، هذول طوال كلشش طوال اطول من Tareq Zalan و Mohamad Thamer*.
هذول انولدو من زواج ابناء الله( الانسان من نسل ادم) و البشر اللي خلقهم ألله باليوم السادس وي السمچ والزوري والخشني و أعبيد الرز والرفش والكواسج.
وهذول مصخوها كلشش، لاهم بشر ولا حشر، الجنجويد احسن منهم.
فقال لنوح:
انت خوش زلمة وخير، اني هذول راح امحيهم من الارض، خربو الفلم كله، انت اگعد سويلك فُلك حتى من تكمل افلكها بيهم واغططهم بالماي.
اصنع سفينتك وسوي طولها ٣٠٠ ذراع مثل مناه ولراس الشارع وسوي عرضه ٥٠ ذراع وارتفاعها ٣٠ ذراع ومن تكملها حط من كلشي ٧ ذكوره و ٧ نثايه، من الطير ومن الوحوش ومن كل شي وكثر الاكل وتقفل الباب زين، لأني بعد ٧ ايام امطرها ٤٠ يوم و ٤٠ ليله واضهضبها تضهضب عليه وعلى الخلفوهم.
هذا الحچي صار عمر نوح ٦٠٠ سنة و٢ شهر و ١٧ يوم ( ضابطها ضبط اخا الاخل، روزنامه) وصار الطوفان،
الطوفان العظيم اللي يگول عليه أبن رب الجنوب رياض أحمد
‫#‏صفى_دمعي_مثل_طوفان_نوح‬ ‫#‏مع_نار_الخليل_أضرمت_بيه‬
وفي العام ستمية وواحد وفي الشهر الاول وفي اليوم الاول منه، نشفت الگاع و حملت الحمامة غصن الزيتون كبشارة لنوح.
نزل نوح وعائلته على جبل ارارت ونزل معه كل ركاب السفينة.
و زرع الارض وبنى مذبحاً لربه للعبادة واقام الرب ميثاقه مع نوح وعلامة الميثاق قوس قزح هذا اليطلع بعد المطر( ‫#‏عگبيش‬! بعد ما غطط الوادم).
وفي احد الايام وبعد يوم عمل، نوح تغده غده زين وصكله كلاصين خمر من هذا الزيين اصلي، داخ ونام صلووخ ربي كما خلقتني،
وطب عليه ابنه حام وشاف المسائل البلاستيكية (عورة ابوه)مالت ابوه وضحك وطلع لاخوته سام ويافث، سام ويافث اجو وغطو عورة ابوهم.
گعد نوح و حس بالمسألة، صاح على حام:
ولك أحويم ‫#‏تفلابارك_الله_بيك‬
تَرووح اتظل طول عمرك عبد لخوتك، يا صگط يا حليل الحيا.
حام: شني السالفة!؟ شسويت!؟ چا اني گايلك تنام مصلخ!؟ شلون اغمض عيوني!؟
وبعدين هاي ‫#‏قصتيش‬؟ اليضحك تخلونه عبد لاخوته طول عمره!؟ هو وذريته!؟ چا ذريتي شعليها!؟
نوح: تَ يلله يلله، جف القلم، يا ادبسز يا ممتربي تبقى عبد العبيد لأخوتك.
وعاش نوح بعد الطوفان ثلاثمائة وخمسين سنة فكانت ايامه كلها تسعمية وخمسين سنة (بس لا اليزابيث الثانية تعيش تسعمية سنة!؟ مگرود يا تشارلز) ثم مات نوح بشيبة صالحة.
يتبع
.................
*لامك ابو نوح، هو غير لامك حفيد قابيل ابو الكاولية والدمبكچية والبزاخه( شوف شلون من كرهو قابيل طلعو نسله كاوليه، و خلو ادم يخلف شيت وعمره ١٣٠ وهيه الوادم عمره ٢٠ وحبوب وفياگرا ومقويات وماتخلف)

قصة الخليقة 10

Tuco Al Sandeigo

April 3 at 11:18am · 

1️⃣0️⃣
‫#‏قصة_الخليقة‬ باللهجة الجنوبية
قابيل وهابيل
انكب ادم وحواء على تربية قابيل وهابيل.
الدنيا تخوف وهمه بعدهم ژهال
دينصورات انواع وأشكال شي تاكل بشي،
نمور واسود وضباع وانواع الحيوانات ويخافون على وليداتهم.
زارعيلهم وصيلة مال گاع ليفوگ من الأمدينة ژاي من سلف الگرامشه، وعدهم صخيلات وغنيمات يحلبونهن وياخذون صويفات الغنم وعلى ‫#‏هلرنة_اطحينچ_ناعم‬

كبرو الفريخات قابيل وهابيل، قابيل يشتغل بالگويعه، وهابيل يرعى بالحلال.
خوش فريخات الله يستر عليهم، حايفهم الله.
كاعدين يتعشون وادم گال لفريخاته:بووية قابيل، بووية هابيل
بعد ابوكم و روحه باچر من كون سالمين، سوو ثواب لوش الله وتعالى بلكت يبارك برزقكم ويستر عليكم ويغفرلنا دگة امكم أم الدايت والرشاقة.
صار بووية، تامر. جاوبو ابوهم.
حواء: انت تبقى تعير ليل ونهار، چا انت مو قضمت قضمة من التفاحة بحلگك الچبير.

بعد الصباح قدم قابيل ثواب لوش الله وتعالى، شواي تميرات برحيات، خيارات عطروزيات، گوگ الله، حندگوگ، كراث، فژل، شواي بصيله.
وگعد يقرا دعاء وهو منهمك في الدعاء وطب هابيل اخوه شايل قوزي هرفي وصخيله وذبحهن على المذبح وسال دمهن
وحط الچلاوي والمعلاگ والحلولو، ذاك اللحم تگول جبن ‫#‏تعال_وشيش‬
الرب مالهم * تقبل الچلاوي والمعلاگ بسرعة حتى بدون دعاء!!
هابيل راد يقرا دعاء، الرب گاله ما يحتاز ما يحتاز دعاء، مقبول مقبول ( ‫#‏رب_لاحم‬).
قابيل اختاظ، وقال في لهابيل:
ولك صدگ چذب، ‫#‏چا‬ اني الچبير وتعبان واقرا دعاء ومحنب من غبشة الگط وين الخضرة الزينة، انگطع عمودي الفقري وصار بيه عرج انسه وانت ابو صنمه ابو الصخول تژي على مال حاضر ويتقبل منك؟
هابيل: أها! چا اني گايلك تسووي ثواب خضرة!؟ اكو واحد يسووي ثواب لوش الله وتعالى حندگوگ وگوگ الله!؟ شگالوك عليه!؟ رب لو خروف!؟

قابيل احترگ گلبه*، تناوش صلبوخ* وگطفه على هابيل.
طاح بيافوخ هابيل والدم نفط مثل نافورة وشخر ومات.
ارتعب قايبل و أُسقط في يده ماذا يفعل؟ شيسووي!؟
الرب مالهم نزله غربان تكاتلن واحد منهم دفن الثاني،
تعلم قابيل و وارا سوءة أخيه( كله سوءه).
عاد الى مهژوم ( بيت) ادم.
ادم: ها بووية ويين اخوك!
قابيل: شمدريني چا اني حارس.
ادم: ولك شو انت ‫#‏صلف‬؟ عليمن طالع؟ على بيت مهاوي؟ ‫#‏لايحتك_ريحة‬؟
نزل ملاك الرب مالهم
وطرد قابيل من وجه ابيه ومن وجه الرب( بعدما علس المعلاگ وشيشه)
.........................
*مالي خلگ الهوامش، طاحت ايدي