زلمة خير وصايم مصلي ماعده زايده ناگصه، يتكفه الشر ويمشي بصف الحايط، وعنده فريخات نعمة من الله سبياعه ولد و تلاياثه بنيات.
وعنده حلال لا هنا ولا هناه، سبعتالاف بس الغنم من غير تلتالاف ژمل، و خمسميت هايشه وخمسميت مطية، و خدم و رعيان.
عايشين بنعيم.
جرت العادة في عائلة ايوب الصالح ان كل يوم يلتمون أبيت واحد من اولاده يذبحون ويطبخون ويلتمون وياكلون سوية، حتى البنات يودي عليهن ابوهن هن وبعولتهن( شفايتلهم) ياكلون وانوب يذبحون للرب #ردود_مظالم
نشدوه: بووية #چا احنه يومية نذبح للرب ثواب، شني مسوي ذنب انت؟
ايوب: لا بووية بعد ابوكم، #بلاكت اگول خاف واحد من اولادي مسويلهم ذنب، مكسورة، واني ما ادري، اذبح لوش الله وتعالى.
وهكذا كانت ايام ايوب واهل ايوب.
.......
ذات يوم جاء ابناء الله( الملايچه) ليمثلوا امام الرب والشيطان بوسطهم.
فقال الرب للشيطان: ها ولـك، ويين ما ويين!؟ شو ماكو؟ منين ژيتك؟
الشيطان: ژيتي من الخواره والمشي بالارض، #چا منيين قابل ژايك من التياترو؟
الرب: أگلك عود هم حطيت بگـلبك حقد على عبدي أيوب؟ لأن ماكو مثله بالبشر، خير و متقي ربه و مايحب الشر. ( نبه الشيطان على الزلمة!!)
الشيطان: هو شنو ايوب!! چا انت غير منعم عليه!؟ غير ساردها عليه سرد!؟ غير منيين ما يلتفت ترزقه!؟
هو بلوشي يتقي الله!؟ هذا الرزق كله طبعن يتقي،
هسه دَ حط ايدك عليه واخذ رزقك منه، تشوفه اذا يكفر كفران أخت الچذب، #يگوم_يطلع_من_گلبه_كفران، حتى اعطية القمرچي ما مكفرهن.
الرب: ها!؟ دَ روح ولك، انطيتك تخويل تلعب بيه لعب، و اتراهن وياك اذا كفر ايوب، عبدي واعرفه.
الشيطان: عبدك وتدفعني عليه!
الرب: شگلت ولك؟
الشيطان: لا ماكو شي احچي وي المضيف مال خطوط الجوية العراقية، عليش دايمن تتأخر طياييرهم.
.........
يتبع
ليست هناك تعليقات:
إرسال تعليق