قصة الخليقة باللهجة الجنوبية 6-

6️⃣
‫#‏قصة_الخليقة‬ باللهجة الجنوبية

مع صياح الديك نهضت حواء التي لم تنم إلا قليلا.
واخذت تهز ادم.
ادم، ادم، اااادم، أكعد أگعد هلبت تمل من النوم!؟
و ادم بالكاد يفتح عينيه من أثر سلطان النوم: ولچ شتردين!؟ خليني نايم، شغل عمل!؟.
صلاة الفجر وصلينا، خلينا نايمين.
حواء: اهووووو أشگد نوام، حبيبي لتصير مكروه، خلينا نتريگ ونطلع، عاجبني نتمشى ونشوف اماكن ماشايفيه.

ادم: خو حرمتيني من النوم، امري لله الواحد القهار.
حواء: يلله حبيبي غسل وخل نتريگ ونطلع، الجنة طويلة عريضة عرضها السماوات والارض خل نستكشفها.
ادم: خوش خوش أم الاستكشافات، الله اليعلم شناويه اليوم، سالفتچ مو خالية، گلبي لاچمني.
حوا: د يلله لاتسويها مناحه تلحگ على النوم.
و تناولوا فطورهما و اخذا اتجاه لم يسلكاه من قبل.
مشو ليلة ويوم، كلما يگول ادم خل نرتاح هنا، ما تقبل حواء.
حتى ساوره هاجس، انها تنوي أمرا وما جعله يفكر بهذا الشأن أنه شاهد الحية في اغلب مراحل رحلتهما وهو امر لم يكن معتاداً.
هنا هنا يم ذيچ الشجرة خل نگعد. قالت حواء.
ولچ هاي يمكن الشجرة الممنوعة!!؟ انت بس الله يستر منچ!
چا مو گالوا ولا تقربا من الشجرة!؟
حواء: هسه انت شخبصتنا بالگالو وگالو؟ و الجنة كلها شجر شمدريك ياهو الكالو عليها!؟ شني منيشنها انت!؟
ادم: وچ كون طرگاعة الطاحت عليچ، عسى ضلعي انكسر ومانخلقتي، ‫#‏لاتچلين_ولاتملين‬ من تريديلچ راده لابد وتسوينها، وچ خل ناكل من غير شجرة إلا هاي!؟ وچ گلبي لاچمني من هاي الشجرة وخاف يصير ما يصير ونبتلي!؟.
حواء: اهوووو حبيبي شبيك خواف، كلشي مايصير وعيونك، واخذت تتمايل و تلمس وجهه بكفيها.
ما طولها عليكم فلتها الافندي واكلو من تفاحة من الشجرة.
واذا ببصرهما يختلف
غشاوة وانقشعت
شاهدا اشياء لم يشاهدها من قبل!!
فأستحيا
وطفقا يخصفان من اوراق الاشجار لتغطية سوءتيهما*
وضحك ابليس مقهقهاً ها ها ها ها ها ها
صارخاً:
هيه يا صم التراب اطفقا واخصفا لتغطيا سوءتيكما وراح اتظل بيك هاي ‫#‏الطفگـة‬ ليوم القيامت.
يتبع

7️⃣
‫#‏قصة_الخليقة‬ باللهجة الجنوبية

بعد أن طفقا يخصفا ليداريا سوءتيهما، ندمت حواء أشد الندم، وقنط ادم أيما قنوط(قنوط قنوط مو قبوط).
وكانت تلك اللحظات مزعجة لجميع من في الملكوت الاعلى بس هذا النغل ابليس خربان من الضحك ومتونس حيل حيل، على اعتبار انه:
اخذ حيفه من ادم
اثبت انه ليس العاصي الوحيد
نجاح اول وسوسه له في رهانه على ان يغوينهم اجمعين.
.....
‫#‏ها_فختي‬!؟ گعدتي من غبشة وحرمتينا من لذيذ النوم، طلعتي متواعدة والحية بت الحية، هسه شوفي شيسوون بينا، مو كاعدين ومتونسسين، أكل وشرب ونوم.

هىء هىء هىء( بكاء حواء)، اني شمدريني حبيت ارضيك واكون رشيقة حتى تكون صلاتي خفيفة.
ولچ بت الخفيفه مو منعونا من هاي الشجرة.
ههىء ههىء ههىء( بكاء حواء)
واذا بالنور يغشاهما
نزل الملاك المقرب:
ها ولچ حوا!؟ تبچين مو!؟ ‫#‏ههو_يزموو‬
چا هو انتي ام الدگايگ، وهذا السطل لايحل ولايربط مسويته حضينه.

ادم: اني كلشمامسوي، هذا ابليس وسوس لحوا وقشمر عليها بحجة الرشاقة.
حوا: كلشمامسويه هيه تفيفيحه اني اكلت قضمة وهذا أبو حلگ اكلها كلها! اني عود كلت سمنانه واريد اضعف حتى صلاتي تصير خفيفة.
كافي كافي سرابيت، أنتم مال جنة!؟
يلله برا، اخرجا منها واهبطا الى الارض.
وأنت يا أبليس اهبط والحية معك وستكونوا بعضكم لبعض عدوا ومن ذراريكم،
يلله عااابت هلچهر.
ادم: اشتعل ابيچ كله من وراچ.
حوا: انت خو كضيتها مستمسك عليه.
ابليس: هاي شبيكم؟ همه من البداية يريدون ينزلونكم للارض، همه يريدونكم خليفة في الارض( هاي ثاني وسوسه للنغل).
الحية: الارض بيها عرابيد!؟
........
يتبع